Ақтөбеде Қазақстандағы ең қуатты газ тарату станциясы пайдалануға берілді

05.10.2017
Ақтөбеде Қазақстандағы ең қуатты газ тарату станциясы пайдалануға берілді






















Ұлттық оператор «ҚазТрансГаз» АҚ «Ақтөбе облысының елді мекендерін газдандыру және газ тарату желілерін жаңғырту» инвестициялық жобасын жүзеге асыру барысында Ақтөбеде өнімділігі сағатына 300 мың текше метрді құрайтын автоматтандырылған газ тарату станциясын (АГТС) іске қосты. Бүгінде бұл АГТС Қазақстандағы ең қуатты станция саналады. 
Елбасы Н.Назарбаевтың Ақтөбені миллион тұрғыны бар заманауи қалаға айналдыру жөніндегі тапсырмасы бірқатар стратегиялық шешімдерді қажет етеді. Солардың бірі – саны артып келе жатқан қала тұрғындары, қазір жұмыс істеп тұрған коммуналдық және өндірістік нысандардың табиғи отынға деген қажеттілігін қанағаттандыру болып табылады. 
Ұлттық оператор «ҚазТрансГаз» АҚ Елбасы тапсырмасын жүзеге асыра келе, қаладағы жұмыс істеп тұрған АГТС-тердің қуатын күшейтіп әрі оларға түсетін салмақты азайтуды мақсат етті. Құрылыс барысында 32 км жаңа газ құбырлары және 2 газ реттеуіш пункт салынды. 
Өнімділігі сағатына 300 мың текше метр болатын аталған  автоматтандырылған газ тарату станциясы облыс орталығы Ақтөбе қаласын ғана емес, қала маңындағы және шалғайдағы 4 ауданның елді мекендерін үздіксіз газбен жабдықтауға қауқарлы. Станцияның қуаты жұмыс істеп тұрғандарды ғана емес, болашақта салынатын өзге де нысандарды газбен қамтуға жетеді.  
Қазіргі уақытта Ақтөбе рельс-арқалық зауыт, Индустриалдық аймақ, қалалық телефон станциясы, Ақтөбе ферроқорытпа зауыты, Қазхром, ЖЭО секілді ірі кәсіпорындармен қатар, көптеген ірілі-ұсақты коммуналдық-тұрмыстық және әлеуметтік нысандар газбен үздіксіз қамтылады. Сонымен қатар станция Ақтөбе маңындағы Қобда, Мәртүк, Алға және Қарғалы аудандарының елді-мекендеріне газ жеткізеді. Бұл серпінді жобаның жүзеге асырылуы және пайдалануға берілуі Ақтөбе өңірінің дамуына оң ықпал етті. Жүргізіліп жатқан газдандыру жұмыстары өңірдің инвестициялық тартымдылығын арттырады, әлеуметтік-экономикалық көрсеткіштердің артуына жағдай жасайды.  
Инвестжобаларды жүзеге асыру кестесіне сай, газ және газбен қамту саласындағы Ұлттық оператор «ҚазТрансГаз» АҚ 2030 жылға қарай Ақтөбе облысының 96% тұрғынын табиғи газбен қамтуды жоспарлап отыр. Облыс бойынша 287 км газ құбыры салынады. 
Анықтама: Қолданыстағы ГТС-1, ГТС-3 Ақтөбе қаласының оңтүстік-батыс бөлігінде өндірістік аймақ пен тұрғын үйлер арасында орналасқан. Ал оған тартылған жеткізуші газ құбыры тұрғын үйлердің арасымен өтеді. Осыны және өткен ғасырдың 60-шы жылдары салынған ГТС-1-дің ескіргенін ескере отырып, облыс әкімдігі заманауи АГТС-300-ді қала сыртында Жаңа Әлжан элеваторының маңында салу туралы шешім қабылдады. Бұл жердің таңдалуы бекер емес. Дәл осы маңда «Жаңажол-Ақтөбе» және «Бұхара-Орал» магистралдық газ құбырлары тоғысқан. Бұл бір-біріне тәуелсіз екі қуат көзінен магистралдық газ құбырларының бірінде апат бола қалған жағдайда үздіксіз газ таратуға мүмкіндік береді. ГТС-1 және ГТС-3-ке жалғанған тұтынушылар жаңа станцияға ауыстырылғаннан кейін қолданыстан шығарылады. 

"ҚазТрансГаз" АҚ – Қазақстанның газ және газбен қамту саласындағы Ұлттық операторы. "ҚазТрансГаз" АҚ Компаниялар тобына газ өндіретін және оның өнімдерін тасымалдап, жеткізумен айналысатын кәсіпорындар мен ұйымдар кіреді.